Informacioni se Cristiano Ronaldo mund të transferohet te Bayern Munich në vend të Robert Lewandowskit, jehoi si rrufe mbrëmë, por gazetari i Sky Sports, Florian Plettenberg, pohon se nuk ka asgjë nga këto.

Plettenberg pohon se që nga ardhja e Ronaldos në radhët e gjigantit bavarez nuk ka asgjë, por ka shumë mundësi që portugezi të largohet nga “Old Trafford”.

Gazetari shkruan se Bayern nuk mund t'i ofrojë kushtet financiare që Ronaldo ka te Manchester United, por edhe bavarezët nuk janë një klub që e ka zakon të bëjë transferime të shtrenjta.

Akuzat se Ronaldo mund të mbërrijë në Bayern u hodhën poshtë edhe nga Christian Falk, gazetar i prestigjiozit "Bild".

Megjithatë, të gjitha burimet pohojnë se Ronaldo do të largohet nga Manchester United nëse skuadra nuk përforcohet në merkaton e verës për të marrë pjesë në garën për titullin e Premierligës.