Pas shpalljes së kandidaturave të Suedisë dhe Finlandës për anëtarësim në NATO, ministri i Jashtëm i Austrisë Alexander Schalenberg tha sot se Austria nuk ka plane të bashkohet me aleancën ushtarake.

"Ne kemi një situatë krejtësisht të ndryshme gjeografike," tha Schallenberg në margjinat e një takimi të ministrave të jashtëm të BE-së në Bruksel.

"Ne kemi një histori shumë të ndryshme dhe unë besoj se kjo thjesht duhet të merret parasysh," shtoi ai.

Megjithatë, kjo nuk do të thotë se Austria është politikisht neutrale.

"Nuk ka asnjë neutralitet në luftën kundër agresionit," tha ai, duke iu referuar pushtimit rus të Ukrainës. “Ne kemi marrë një qëndrim shumë të qartë, ne mbështesim të gjitha sanksionet dhe po bëjmë atë që mundemi në aspektin e mbështetjes”, shtoi ministri i Jashtëm austriak.

I pyetur nëse siguria e Austrisë mund të garantohet pavarësisht se mbetet jashtë NATO-s, Schallenberg tha se Austria synon të rrisë investimet në sigurinë e saj.

“Ishte e rëndësishme të kuptojmë se bota nuk është aq miqësore sa do të donim të ishte”, tha ai, duke shtuar se kishte vende që ishin të gatshme të përdornin forcën ushtarake për të ndjekur interesat e tyre.