Austria është e vendosur në qëndrimin e saj për të mos nxituar dëbimet e qytetarëve sirianë derisa të ketë një ndryshim "të rëndësishëm dhe të përhershëm" të situatës në Siri, pavarësisht ofensivës verbale të politikanëve, të cilët kanë "bombarduar" rrjetet sociale me mesazhe për riatdhesimin, duke ndaluar proceset për azil dhe heqjen e çdo lloj mbështetjeje për refugjatët.

Sirianë nga Austria u mblodhën në qendër të Vjenës për të mirëpritur rënien e regjimit të Bashar al-Assad në vendin e tyre, por politikanët, veçanërisht ata nga partitë e krahut të djathtë, thanë se kishte ardhur koha që dhjetëra mijëra refugjatë të kthehen në vendin e tyre.

Ministria e Brendshme njoftoi se vendimi për të pritur riatdhesimin është marrë në përputhje me vlerësimet e deritanishme të Zyrës Federale për të Huaj dhe Azil për shkak të situatës në vendin e përfshirë nga konflikti shumëvjeçar. Burime të ministrisë i thanë Agjencisë Austriake të Lajmeve se vlerësimi i ri do të kryhet në "koordinim të ngushtë me partnerët evropianë".

Austria nuk është i vetmi vend që aktualisht nuk planifikon deportime në Siri. Anëtarët e tjerë të Bashkimit Evropian, përfshirë Gjermaninë, veprojnë në mënyrë të ngjashme. Berlini, megjithatë, reagoi ndaj lajmit për rënien e regjimit të Asadit duke ngrirë përpunimin e kërkesave për azil nga sirianë.

“Qëllimi ynë është të sigurojmë një bazë solide për vendime dhe të garantojmë se dëbimi i qytetarëve sirianë do të jetë në përputhje me standardet e zbatueshme të të drejtave të njeriut”, tha zëdhënësi i MPB-së.

Në të kundërt, Libani, i cili është shtëpia e më shumë se 1 milion refugjatëve sirianë, ka hapur një proces për kthimin e disa kategorive të refugjatëve në Siri, pavarësisht kritikave nga organizatat ndërkombëtare. Në Turqi, e cila ka pranuar rreth 3 milionë refugjatë sirianë, publiku po ushtron presion në rritje ndaj autoriteteve për të filluar kthimin e refugjatëve.

Në Austri, sirianët vazhdojnë të bëjnë numrin më të madh të kërkesave për azil. Vetëm në tre muajt e parë të vitit janë paraqitur 2.572 kërkesa, ndërsa në statistikat afatgjata të 2015-ës janë në krye me gjithsej 90.404 kërkesa të paraqitura, përpara afganëve (84.803) dhe indianëve (23.683).

Sipas të dhënave të marsit të këtij viti, 62 për qind e kërkesave për azil të qytetarëve sirianë në Austri zgjidhen pozitivisht, dhe 21 për qind refuzohen ose klasifikohen si "të tjera". Që nga fillimi i vitit janë marrë 904 vendime negative për sirianët.

Në vendet e tjera të Bashkimit Evropian, deportimet kryhen rregullisht në bazë të Marrëveshjes së Dublinit, në të cilën përcaktohet se vendi në të cilin personi ka hyrë për herë të parë në territorin e BE-së është përgjegjës për procesin e azilit.

Ministria në Vjenë theksoi se Austria do të inkurajojë në mënyrë aktive kthimin vullnetar të refugjatëve, duke ofruar mbështetje logjistike dhe ndihmë financiare për të kthyerit, por se dëbimi i detyruar është i mundur vetëm nëse ka një vendim përfundimtar dhe nëse kthimi mund të kryhet në përputhje me Konventa Evropiane për të Drejtat e Njeriut dhe vendimet e Gjykatës Administrative Austriake.

Zyra Federale për të Huaj dhe Azil (BFA) monitoron vazhdimisht zhvillimin e situatës në Siri, si dhe vendimet përkatëse të gjykatave. Dokumentacioni shtetëror, i cili shërben si bazë për procedurat e azilit, përditësohet rregullisht për të lejuar përshtatjen për çdo rast individual.

- Në këtë mënyrë, ndryshimet aktuale të situatës mund të merren parasysh në të gjitha fazat e procesit të vendimmarrjes - njofton Ministria.