Tre lojtarë kyç të politikës së jashtme në krizën siriane janë përpjekur të rimarrin kontrollin e rebelimit duke bërë thirrje për dialog midis presidentit sirian Bashar al-Assad dhe grupeve opozitare, duke shtuar se do të ishte "e papranueshme" përdorimi i terroristëve për të marrë kontrollin e vendit. raporton Guardian.

Në margjinat e Forumit të Dohas, Katari, Turqia, Rusia dhe Irani i kërkuan opozitës siriane t'i përgjigjet thirrjes për përfundimin e luftimeve dhe ruajtjen e Sirisë si një vend i integruar.

Mes raporteve se diplomatët rusë po ikin nga Damasku për shkak të përparimit të shpejtë të opozitës, ministri i Jashtëm rus Sergei Lavrov tha se "Rusia po përpiqet të bëjë gjithçka që është e mundur për të parandaluar që terroristët të fitojnë dorën e epërme, pavarësisht se ata thonë se nuk janë terroristë". Ai tha gjithashtu se po bëhen përpjekje që al-Assad të normalizojë marrëdhëniet me Turqinë, duke përfshirë kërkesën e Ankarasë për të ndërhyrë për të parandaluar forcat kurde që të përdorin Sirinë veriore për sulme.

Në fillim të këtij viti, al-Assad refuzoi të bisedonte me Turqinë për sa kohë që forcat turke mbetën në Siri. Ky refuzim bëri që presidenti Recep Tayyip Erdogan të mbështeste në mënyrë implicite grupin militant Hayat al-Sham, i cili ka kryer sulme shumë të suksesshme në Aleppo dhe qytetin e Homsit.

Siç shkruan Guardian, ndërsa pushteti i Al-Asadit, i cili ishte në pushtet prej 24 vitesh, po zbehet, lideri sirian nuk do të ketë zgjidhje tjetër veçse t'i bëjë lëshime Turqisë për çështjen kurde.

Por nuk ka asnjë garanci se Turqia mund të kontrollojë grupin Hayat al-Sham ose ta urdhërojë atë të përfundojë një ofensivë që ka rezultuar shumë më efektive nga sa ata vetë prisnin.

Lavrov ka theksuar vazhdimisht se Hayat al-Sham është në listën e grupeve terroriste të Shteteve të Bashkuara dhe Kombeve të Bashkuara. Ai gjithashtu vuri në dyshim nëse grupi kishte rrënjë në Al-Kaeda.

“Nëse grupet opozitare do të ishin përgjegjës dhe nëse do të kujdeseshin për vendin e tyre, nuk do të kishin lejuar që ky konflikt të vazhdonte”, tha ai.

Duke pranuar se nuk mund të parashikonte rezultatin e luftimeve, Lavrov tha se "Rusia po i ndihmon ushtarët sirianë me forcat e tyre për t'iu kundërvënë sulmeve terroriste".