Senati amerikan miratoi një ligj që mbron martesat mes të njëjtit seks

Flamuri i SHBA dhe LGBTI+/ Foto Priakhin Mikhail / Alamy / Alamy / Profimedia

Senati amerikan miratoi mbrëmë një projekt-ligj për të mbrojtur martesat e të njëjtit seks në të gjithë SHBA-në, një masë që vjen si përgjigje ndaj shqetësimeve se Gjykata e Lartë mund të anulojë një vendim të vitit 2015 për legalizimin e martesës së të njëjtit seks në mbarë vendin.

Projektligji, i cili do t'i kërkonte qeverisë federale të njohë një martesë nëse ajo është e ligjshme në shtetin ku ajo u zhvillua, do të jetë një ndalesë nëse Gjykata e Lartë vendos kundër martesës së të njëjtit seks.

Masa nuk do t'i ndalojë shtetet që të bllokojnë martesat e të njëjtit seks ose ndërraciale nëse Gjykata e Lartë i lejon ta bëjnë këtë. "Sot, marshimi i gjatë por i palodhur drejt barazisë më të madhe ec përpara," tha udhëheqësi i shumicës në Senat, Chuck Schumer.

“Duke miratuar këtë projekt-ligj, Senati po dërgon një mesazh që çdo amerikan duhet ta dëgjojë: Pavarësisht se kush jeni apo kë doni, edhe ju meritoni dinjitet dhe trajtim të barabartë sipas ligjit”, shtoi ai.

Ligji mori 61 vota, një më shumë se 60 votat e nevojshme për miratimin e tij. Kundër ishin 36 senatorë. Dymbëdhjetë republikanë iu bashkuan 49 demokratëve në mbështetjen e projektligjit. Një demokrat, Raphael Warnock i Gjeorgjisë, mungonte, ashtu si edhe dy senatorë republikanë.

Një projekt-ligj i ngjashëm, por jo identik, kaloi Dhomën e Përfaqësuesve në fillim të këtij viti me mbështetjen e 47 republikanëve dhe të gjithë demokratëve. Dhoma e Përfaqësuesve duhet të miratojë versionin e Senatit përpara se t'i dërgohet Presidentit Joe Biden për të nënshkruar në ligj.

Rreth 568.000 çifte të martuara të të njëjtit seks jetojnë në Shtetet e Bashkuara, sipas Byrosë së Regjistrimit të SHBA.

Video e ditës