Përfaqësuesit në Senatin Amerikan, dhoma e lartë e Kongresit, prezantuan të enjten dy projektligje të veçanta për inteligjencën artificiale, duke pasur parasysh interesin në rritje për zgjidhjen e çështjeve që lidhen me këtë teknologji.

Propozimi i parë kërkon transparencë nga qeveria amerikane kur përdoret inteligjenca artificiale në ndërveprim me qytetarët, ndërsa propozimi i dytë kërkon ngritjen e një Zyre të re, prioriteti i së cilës do të jetë konkurrueshmëria e Shteteve të Bashkuara kur bëhet fjalë për teknologjitë moderne.

Ligjvënësit po shqyrtojnë rregulla të reja të nevojshme për rritjen e inteligjencës artificiale, e cila është bërë e zakonshme këtë vit falë përdorimit të ChatGPT, një program që u përgjigjet pyetjeve në formë të shkruar dhe të strukturuar.

Senatori demokrat Gary Peters, gjithashtu kryetar i Komitetit të Sigurisë Kombëtare, së bashku me republikanët Mike Brown dhe James Lankford, kanë paraqitur një propozim që do t'u kërkonte agjencive qeveritare të njoftojnë qytetarët kur përdorin programe të inteligjencës artificiale për të komunikuar me ta.

Ky propozim gjithashtu detyron agjencitë qeveritare të lejojnë kundërshtime ndaj vendimeve të mundshme të marra nga inteligjenca artificiale.

“Qeveria federale duhet të jetë proaktive dhe transparente në lidhje me përdorimin e inteligjencës artificiale dhe të sigurojë që vendimet të mos merren pa dorën e njeriut ‘pas timonit’”, tha Brown.

Demokratët Michael Bennett dhe Mark Warner dhe përfaqësuesi republikan Todd Young po bëjnë thirrje për krijimin e një Zyre të Analizës Globale të Konkurrencës, detyra kryesore e së cilës do të jetë të mbajë Shtetet e Bashkuara si lider në zhvillimin e inteligjencës artificiale.

"Ne nuk mund të lejojmë të humbasim avantazhin në zhvillimin e teknologjive, duke përfshirë inteligjencën artificiale, ndaj konkurrentëve si Kina," tha Bennett.

Në fillim të kësaj jave, udhëheqësi demokrat i Senatit Chuck Schumer tha se kishte organizuar tre takime, i pari prej të cilave do të ishte me dyer të mbyllura, ku senatorët mund të njiheshin me këtë çështje në detaje.

Në këto takime, përfaqësuesit do të diskutojnë zhvillimet aktuale në inteligjencën artificiale, lidershipin amerikan në fushën e inteligjencës artificiale dhe një sërë çështjesh konfidenciale të mbrojtjes dhe inteligjencës.