Ligjvënësit amerikanë miratuan një projekt-ligj të përkohshëm financimi në minutën e fundit për të shmangur mbylljen e qeverisë amerikane.

Një kthesë befasuese ndodhi në Kongres mbrëmë dhe u miratua ligji për financimin e qeverisë amerikane, duke parandaluar kështu bllokadën e pritshme në momentin e fundit.

Ligji u mbështet nga ligjvënësit demokratë dhe republikanë mbrëmë vonë, duke ia dërguar Presidentit të Shteteve të Bashkuara Joe Biden për miratim pak para afatit të mesnatës. Biden nënshkroi projektligjin e përkohshëm të financimit.

Kryetari i Dhomës së Përfaqësuesve, Kevin McCarthy, një republikan, propozoi masën e përkohshme të financimit, e cila u miratua nga 335 ligjvënës, me 91 kundër.

Më pas, projektligji kaloi në Senat, ku mazhorancën e përbëjnë demokratët. Është planifikuar financimi i administratës me fonde emergjente në 45 ditët e ardhshme, deri më 17 nëntor.