Presidenti i Surinamit do të shpërndajë pasurinë e naftës për të gjithë qytetarët në mënyrë të barabartë. Të paktën, kjo është ajo që premtoi Presidenti Chandrikapersad Santoki në festën e 49-vjetorit të pavarësisë së ish-kolonisë holandeze në Amerikën e Jugut.

Santoki shpjegoi se, si një nga projektet më të mëdha në shtet, çdo banor do të marrë rreth 750 dollarë aksione nga rezervat e shtetit të gazit dhe naftës.

Rritja e vlerësuar e vlerës së aksioneve prej 7 për qind në vit për presidentin paraqet siguri për brezat e ardhshëm. Projekti i qeverisë do të nisë në vitin 2028.

- Ne po investojmë në të ardhmen - tha presidenti me krenari.

Në Kushtetutën e Surinamit, burimet natyrore të vendit përcaktohen si pronë e përbashkët e të gjithë qytetarëve.

Surinami ka arritur një marrëveshje prej 10,5 miliardë dollarësh me kompaninë franceze të naftës “Total Energies” për shfrytëzimin e naftës nga pjesa veriore e vendit. Kapaciteti i nxjerrjes së naftës vlerësohet në rreth 220.000 fuçi në ditë, ose rreth 35 milionë litra.

Nxjerrja dhe eksporti i derivateve të naftës është "pompa" kryesore e parave në buxhetin e shtetit dhe sipas parashikimeve të ekspertëve të ekonomisë, ky projekt do t'i sjellë Surinamit 10 deri në 20 miliardë dollarë në dhjetë vitet e ardhshme.

Pavarësisht pasurisë së madhe të naftës, një në pesë banorë të Surinamit jeton në varfëri, sipas raporteve të Bankës Botërore.

Santoki tha se është i vetëdijshëm për "mallkimin e naftës" që ndjek vendet me rezerva të mëdha nafte, si Angola, Venezuela apo Algjeria, të cilat nuk kanë arritur të shndërrojnë burimet e naftës në fitim ekonomik. Ai shtoi se po ndjek shembullin e Norvegjisë, i vetmi vend që nuk ka shpenzuar fondet e marra nga prodhimi dhe shitja e pasurisë së naftës.