Shqipëria nuk ka informacion për një sulm të mundshëm terrorist nga Irani
Pas sulmeve kibernetike ndaj sistemeve të institucioneve shqiptare, i pyetur se sa e kërcënuar është Shqipëria nga një sulm terrorist iranian, kryeministri Edi Rama thotë se deri më tani “nuk ka informacion për rrezik të shtuar”.
Megjithatë, shton ai, se në çdo rast Shqipëria ndjek gjithçka, sepse “para nesh kemi një regjim djallëzor dhe të paparashikueshëm”.
“Nuk kemi të dhëna që ndihemi të kërcënuar, por nga ana tjetër kemi një regjim djallëzor, i cili mund të jetë i paparashikueshëm, thotë Rama.
Ai rithekson se nga sulmet kibernetike nuk është vjedhur asnjë e dhënë sensitive e shtetasve shqiptarë.
“Nuk ka ende të dhëna në sistemin dixhital, ndaj sulmet e ardhura nga Irani nuk mund të kenë asnjë të dhënë për shtetasit shqiptarë apo të kenë lidhje me të dhëna sekrete”, pohoi Rama.
Sipas tij, të gjitha hetimet dhe të gjitha të dhënat flasin për grupe që punojnë me urdhër dhe sponsorizimin e drejtpërdrejtë të qeverisë iraniane.
Shqipëria u sulmua nga hakerat më 15 korrik, kur la jashtë funksionit të gjitha sistemet qeveritare për tre javë.
E dyta ishte mbrëmja e 9 të këtij muaji, kur u sulmua sistemi TIMS në pikat kufitare, si dhe dy sistemet e brendshme të policisë, ADAMS dhe MEMEX, ku janë regjistruar prej vitesh të dhënat kryesore për kriminelët.
Më pas hakerët nisën publikimin e të dhënave dhe tre ditë më parë Prokuroria ia ndaloi mediave ripublikimin e tyre.