Ahmeti iu përgjigj Mickoskit: Do të përdorim të gjitha masat demokratike për të parandaluar poshtërimin e shqiptarëve
Pasi kryeministri Hristijan Mickoski sot në një konferencë për media bëri të ditur publikisht se kanë informacione që flasin për planin e BDI-së për destabilizim, sot pasdite ka reaguar partia e Ali Ahmetit.
BDI thotë se do të ndërmarrin të gjitha masat demokratike për të parandaluar poshtërimin dhe mazhoritizimin e shqiptarëve përmes imponimit të vasalëve.
“BDI si parti shtetformuese është garantuese e paqes, stabilitetit, mirëqenies dhe të ardhmes evropiane të vendit. Pa komentuar spina dhe bllofe politike, duam të sqarojmë se kemi mandat dhe përgjegjësi nga votuesit shqiptarë për të mbrojtur legjitimitetin, vullnetin politik dhe dinjitetin e zërit dhe të popullit shqiptar në Maqedoninë e Veriut”, thonë nga BDI.3.
Ndërsa për ato që thonë se janë “akuza të pabaza për shkelje të ligjit”, BDI-ja u ka bërë thirrje edhe një herë partive politike që të kontrollojnë të gjithë bartësit e posteve publike me ndihmën ndërkombëtare.
“Kjo është e vetmja mënyrë se si do të ndalet bllofi, gjuetia e shtrigave dhe abuzimi i luftës kundër korrupsionit për qëllime politike”, tha partia.
