Administrata e Donald Trump po ushtron presion ndaj autoriteteve rumune që të heqin kufizimet e udhëtimit për vëllezërit Andrew dhe Tristan Tate, ndikues të njohur dhe figura të diskutueshme në platformat e krahut të djathtë në internet, shkruan "Times Financial".

Vëllezërit Tate, të cilët kanë nënshtetësi amerikane dhe britanike, u arrestuan në Rumani në vitin 2022 me akuzat për trafikim njerëzor, ngacmim seksual, pastrim parash dhe drejtimin e një grupi të krimit të organizuar. Të dy mohojnë akuzat, ndërsa çështja po tërheq vëmendjen e gjerë në mediat e djathta.

Sipas burimeve të gazetës, zyrtarët amerikanë kontaktuan qeverinë rumune javën e kaluar dhe i dërguari i posaçëm i administratës Trump, Richard Grenell, e ngriti këtë çështje gjatë një takimi me Ministrin e Jashtëm rumun Emil Hurezeanu në Konferencën e Sigurisë në Mynih.

Grenell mohoi çdo diskutim zyrtar, por tha se ai mbështet vëllezërit Tate, gjë të cilën ai e konfirmoi në postimet publike në mediat sociale. Ai kritikoi gjithashtu keqpërdorimin e supozuar të fondeve të USAID-it kundër "politikanëve anti-globalistë".

Vëllezërit Tate, të cilët kanë miliona ndjekës në "manosferë" - një komunitet online që promovon supremacinë mashkullore dhe refuzon feminizmin, janë bërë simbol i rezistencës në qarqet e krahut të djathtë. Andrew Tate shpesh shquhet si një mbështetës i Trump, ndërsa Tristan Tate argumenton se ndikimi i tyre tek votuesit e rinj në SHBA dhe Evropë ka kontribuar në forcimin e pikëpamjeve të krahut të djathtë.

Përveç gjyqit rumun, Mbretëria e Bashkuar po kërkon ekstradimin e tyre me akuzën e përdhunimit dhe trafikimit të qenieve njerëzore, ndërsa ata përballen me një padi civile në Shtetet e Bashkuara për gjoja detyrimin e një gruaje në punë seksuale. Së fundmi ata arritën një fitore ligjore në Rumani, pasi një gjykatë e apelit ia ktheu çështjen prokurorëve, por ata ende nuk lejohen të largohen nga vendi.

Kritika ndaj Rumanisë erdhi edhe nga nënpresidenti i SHBA J.D. Vance, i cili dënoi autoritetet rumune për anulimin e zgjedhjeve presidenciale të vendit. Në dhjetor të vitit të kaluar, gjykata kushtetuese e Rumanisë vendosi të anulojë procesin zgjedhor për shkak të parregullsive të supozuara, duke përfshirë një fushatë të sofistikuar të mediave sociale që dyshohet se ishte e koordinuar me Moskën.

Vance akuzoi Rumaninë për marrjen e vendimit nën presionin e madh nga fqinjët e saj evropianë. Kritikat janë intensifikuar që kur kandidati i krahut të djathtë, Calin Georgescu, fitoi zgjedhjet dhe planifikon të kandidojë sërish në zgjedhjet e reja në maj. Vërejtjet e Vance për politikën rumune u panë si mbështetje për politikanët e krahut të djathtë që kundërshtojnë ndikimin globalist dhe akuzojnë BE-në për korruptim të institucioneve demokratike.