Спорот за островите меѓу Токио и Сеул ескалира, откажана средбата во Вашингтон
Заменик-министерот за надворешни работи на Јапонија се повлече од планираната прес-конференција во Вашингтон со колегите од Јужна Кореја и САД, по територијалниот спор меѓу Токио и Сеул, изјави портпаролот на јапонската амбасада, пренесува Гардијан.
Американскиот заменик државен секретар Венди Шерман мораше да одговара на прашања во отсуство на јужнокорејскиот дипломат Чои Џонг Кун и јапонскиот заменик министер за надворешни работи Таке Мори.
Шерман рече дека „постојат некои билатерални разлики меѓу Токио и Сеул кои треба да се решат“, но додаде дека откажувањето на заедничката прес-конференција не е поврзано со претходната трилатерална средба, која таа ја нарече „конструктивна и значајна“.
Портпаролот на јапонската амбасада изјави дека Токио во вторникот поднел остар протест поради посетата на шефот на јужнокорејската полиција на спорните острови меѓу двете земји, кои во Јапонија се нарекуваат Такешима.
Групата острови кои сочинуваат претежно вулкански карпи ја контролира Сеул, кој ги нарекува Докдо, но и Јапонија ги смета за свои.
„Под овие услови, решивме дека не е соодветно да се одржи заедничка прес-конференција“, изјави портпаролот на јапонската амбасада.
Чои им изјави на новинарите во Вашингтон дека јапонската страна ги информирала дека нема да учествуваат на конференцијата, непосредно пред почетокот на трилатералните разговори.