Британските власти побараа да бидат забранети летови над замокот Виндзор, каде што вообичаено престојува кралицата Елизабета Втора откако почна пандемијата на ковид-19.

Ако барањето биде одобрено, за забранета зона ќе биде прогласен воздушниот регион во радиус од 1,5 наутичка милја околу замокот и до височина од 2.500 стапки (762 метри).

Полицијата тврди дека барањето не е поврзано со каква било специфична закана за кралицата ниту за предупредување од разузнавачките служби, туку заради „зајакнување на безбедноста на локацијата и на заедницата околу замокот“.

Затворањето на „небото“ над Виндзор, сепак, се смета за реакција на неодамнешниот упад во замокот додека во него престојувала кралицата. Во внатрешниот периметар било запрено и приведено 19-годишно момче, кое наводно носело самострел со стрели. Информацијата за оружјето не е официјално потврдена, но Метрополитен полицијата објави дека „натрапникот бил префрлен на болничко лекување“.