Кандидатот за претседател на СДСМ, Димитар Ковачевски вечерва ја презентираше својата програма во Куманово. Тој беше придружуван и од министерот за внатрешни работи Оливер Спасовски, како и од Андреј Жерновски и поранешниот организациски секретар на СДСМ, Миле Зечевиќ.

– На средбата каде ја презентирав програмата присуствуваа и наши членови на раководствата од Крива Паланка, Кратово, Ранковце, Липково, Старо Нагоричане и Арачиново. Пред нив истакнав дека на СДСМ му е потребен јасен и фер внатрепартиски систем каде луѓето се почитувани и наградувани согласно придонесот. СДСМ секогаш била и мора да остане партија која обединува, а партијата мора да е препознаена преку чесни, посветени и ангажирани луѓе. Посветеноста и одговорноста на секој кој има партиска функција ќе биде единствено мерило за напредок. Јас сум убеден дека ваквиот пристап ќе придонесе за поголема мотивација и ангажман на целото членство на СДСМ, но и поддршка на сите граѓани, напиша Ковачевски на Фејсбук.

Во исто време, министерот за внатрешни работи и актуелен потпретседател на СДСМ, Оливер Спасовски објави повик до членството да гласа за Ковачевски за нов партиски лидер, во кој му порача на кандидатот и „да биде најмалку како што бил Зоран Заев во Куманово“.

„Повикувам на 12 декември да го избереме Димитар Ковачевски за нов претседател на СДСМ, а на другарот Димитар му порачувам да биде најмалку како што беше Зоран Заев за Куманово!“, напиша Спасовски на Фејсбук.