Финансиската криза ги натера челниците на Барселона да направат смена на генерациите и таа задача да му ја доверат на Роналд Куман.

Во време кога се прават документарни филмови за сè и сешто, на таков чекор се одлучи и тренерот Роналд Куман кој сними документарец за своето искуство на „Камп Ноу“, кој го објави холандска телевизија.

Од виденото во документарецот, шпанските медиуми донесоа заклучок дека на Куман не му е седно што претседателот Жоан Лапорта не застана цврство зад Холанѓанецот и дека го остави на клупата само бидејќи летово не успеа да најде соодветна замена (не се договори со Чави Ернандез).

Куман изгледа дека поради тоа одлучи да работи како и поголем дел од вработените во Барселона, да работи тоа што тој сака, да зема плата и да чека да биде отпуштен за да може да си замине со милионска отпремнина.

Доволен доказ за тоа е и неисполнувањето на клаузулите во неговиот нов договор, како што се дека мора да ја следи фудбалската филозофија на игра на Јохан Кројф и дека мора да го става во игра Рики Пуџ.
Но, Куман ниту ја следи филозофијата на Кројф, ниту му дава шанса на Пуџ.

Голем дел од вината лежи и во Жоан Лапорта кој на почеток од годинава седна во претседателската фотелја, но овој пат за разлика од првиот мандат не носи храбри одлуки и се повеќе личи на неговиот претходник Хосеп Марија Бартомеу.

Но, во документарниот филм, Куман открива дека една од визиите и агентите на Лапорта е да се врати славата на академијата на Барселона, Ла Масија. Лапорта сака младите таленти од Ла Масија да добиваат поголема шанса за да може за две-три години да бидат носители на играта на Барселона.

Уште еден дополниелен мотив на Лапорта за оваа идеја се ниските плати на младите фудбалери, но и надежта дека екстра талентираните млади фудбалери предводени од Ансу Фати ќе успеат да ги повторат успесите на Меси, Чави Ернандез и Андрес Иниеста кои исто така беа продукт на Ла Масија.

Каталонскиот весник „Мундо Депортиво“ веќе состави тим кој го нарече „бејби тим“ кој е составен од играчи кои се продукт на Ла Масија.
На голот е Ињаки Пења, Оскар Мингеса и Сержињо Дест се десни бекови, Роналд Араухо и Ерик Гарсија се штопери додека Алехандро Балде е лев бек.
Во средниот ред се Нико Гонзалес, Пабло Паес Гавира-Гави и Рики Пуџ, а нападот го предводат Јусуф Демир, Ансу Фати и Педри Гонзалес. Најмладиот фудбалер во овој тим има 17 години, а најстариот 22 години.

Куман веќе им даде шанса на дел од овие фудбалери, Мингеса, Конрад де ла Фуенте и Илаиш Мориба уште минатата сезона дебитираа за првиот тим, а оваа сезона шанса добија и Нико Хонзалес (19 години) против Реал Сосиедад, Јусуф Демир (18) против Атлетик Билбао, Гави (17) имаше одлично деби против Хетафе, а Алехандро Балде (17) дебитираше во Лигата на шампионите. Гави, Балде и Демир се меѓу петте најмлади фудбалери кои се пријавени за настап во Лигата на шампионите.