Спалети воодушевен од Елмас: Во тимот имам феномен

EPA-EFE/CESARE ABBATE

Екипата на Наполи во следната сезона ќе биде предводена од Лучано Спалети кој доаѓа на местото на Џенаро Гатузо, а новиот тренер на стартот од подготовките не крие дека е импресиониран од македонскиот репрезентативец Елиф Елмас.

Спалети на отворениот ден на екипата, на новинарите и на навивачите кои му поставуваа прашања им откри дека во Наполи има „феномен“ кој не може секој да го разбере.
– Не можете да ги разберете карактеристиките на Елмас, зашто ги има премногу. Зашто може да го користите каде сакате – одговори Спалети.

Според Спалети, Елмас ќе биде важен играч во неговите замисли, што е сосема спротивно од Гатузо, кој немаше голема доверба во квалитетите на македонскиот репрезентативец. Новиот тренер најави дека Елмас ќе игра како класичен плејмејкер во формацијата 4-2-3-1.

Елмас е фудбалер кој буквално може да игра каде сакате. Ние пред себе имаме нешто навистина исклучително, кога ќе ги погледнете сите негови квалитети и карактеристики. Веројатно се соочуваме со феномен. Тој е важен играч за кого јас многу добро знам каде ќе биде во тимот. Мислам дека најдобро ќе биде да е вистински фудбалер за врска, зашто секогаш е поврзан со топката, иако се чувствува добро во секоја улога – дополнува Спалети.

На стартот од контролните натпревари, Наполи славеше со 12:0 против нисколигашот Ауниа, а Елмас го даде првиот гол и асистираше при постигнувањето на уште два гола.

Видео на денот