Совршен тренер: Комбинација на Клоп и Гвардиола
Ѕвездата на Баерн Минхен, Роберт Левандовски знае како треба да изгледа совршениот фудбалски тренер.
Левандовски работеше и со двајцата тренери, Клоп го донесе Полјакот во Борусија Дортмунд во 2010 година, додека од 2013 до 2016 тренер во Баерн му беше токму Гвардиола.
– Кога бев член на Борусија, се обложив со Клоп дека ќе ми даде 50 евра доколку постигнам 10 гола на тренинг. На првиот тренинг дадов три или четири, а потоа седум или осум.
Три месеци подоцна можев на секој тренинг да постигнам по 10 гола. Тогаш Клоп ми рече дека за него тоа е премногу и не сака повеќе да се обложува со мене. Тој ми помогна да напредувам. Клоп е неверојатен и му верувате на секој негов збор – вели Левандовски.
Одличниот напаѓач признава дека фудбалски созреа под тренерската палка на Пеп Гвардиола.
– Многу научив од него. Често зборувавме за тактиката, што за мене претставуваше новост. Знаев дека тоа ќе биде добро за мојот напредок. Тие двајца се потполно различни тренери, а со нивната комбинација би добиле совршен тренер – вели Левандовски кој сезонава на 32 натпревари за Баерн постигна 38 голови.