Центарот за нови иницијативи во уметноста и културата „Локомотива“ ја прошири програмата „Современа култура и културни политики“ за 2020 година и во неа вклучи размислувања и рефлексии за променливите услови предизвикани од моменталната состојба на пандемија со коронавирусот.

Со хаштагот „#АрхиваНаРефлексии“ е означен сегментот во кој секој работен ден, почнувајќи од 27 мај, на Јутјуб-каналот на „Локомотива“ се објавуваат снимени видеоинтервјуа на 30-ина културни работници, уметници, критичари и активисти на граѓанското општество од земјава и од странство.

– Во овие непредвидливи времиња и веќе соочени со нашата кревка позиција во општеството, имаме итна потреба од рефлексија со нашите колеги, партнери и пријатели. Ситуацијата со коронавирусот влијаеше на нашите програми, на условите за работа, на меѓународните соработки, на уметничката продукција, на создавањето и ширењето на знаењата итн.

Затоа решивме да создадеме архива на размислувања за сегашните и претстојните социо-политички и економски влијанија врз уметноста и културата во општествата како нашето, кои имаат многу кревки услови за работа на културните работници и уметници, како и во општествата со поорганизиран систем на поддршка на културната продукција. Сметаме дека оваа архива на рефлексии е обид за создавање нов јавен простор, бидејќи веќе постојниот е одземен од вирусот – велат од „Локомотива“.

Прашањата на кои зборуваат учесниците во проектот се однесуваат на културата на солидарност, создавање и ширење на знаењата во овие времиња, нови модели на поддршка на современата продукција и мерките за надминување на несигурната прекаријатна позиција на уметниците и културните работници.

Програмски уредници на активноста „#АрхиваНаРефлексии“ се Биљана Тануровска Ќулавковски и Виолета Качакова, а координатор е Зорица Зафировска.

(Текстот е објавен во „Културен печат“ број 33, во печатеното издание на „Слободен печат“ на 30-31 мај 2020)