Советот за безбедност на Обединетите нации усвои резолуција со која бара безусловно примирје во Либија, како и почитување на ембаргото за увоз на оружје во оваа земја, повлекување на сите странски платеници и немешање на членките на ОН во кризата во оваа африканска земја, јави агенцијата Анадолија.

Предлог резолуцијата на Советот за безбедност ја поднесе Велика Британија и тоа во рамките на иницијативата за воспоставување трајно примирје во Либија.

Предлогот е усвоен со 14 гласови „за”, додека Русија беше „воздржана”.

Делегацијата од Москва беше незадоволна од споменувањето на странските платеници, но не го искористи правото на вето, туку само беше воздржана.

Резолуцијата на ОН бара итно и безусловно примирје во Либија, а од членките на ОН се бара да не се мешаат во кризата и да ја почитуваат забраната на испраќање оружје во Либија.

Во резолуцијата понатаму се бара примена на заклучоците донесени на мировната конференција што минатиот месец се оддржа во Берлин, а генералниот секретар на ОН Антонио Гутереш е задолжен да ги подготви документите што ќе го содржат условите и предлозите потребни за надзор на почитувањето на примирјето во Либија.