Советот за безбедност на ОН изрази длабока загриженост за состојбата во Мјанмар
Советот за безбедност на ОН денеска усвои декларација за Мјанмар, во која изразува „длабока загриженост” за наметнатата вонредна состојба и бара ослободување на „сите уапсени”, наведоа дипломатски извори.
Текстот на декларацијата, составен од Велика Британија, не го осудува воениот удар, како што беше предвидено во првата верзија од документот, претставен на вчерашниот вонреден состанок на СБ на ОН.
Кина и Русија беа против првичната формулација, соопштија дипломатски извори.
Декларацијата повикува на враќање на дијалогот и демократскиот процес во Мјанмар.
-Подобро е да имате текст што вели помалку отколку никаков текст, изјави неименуван дипломат на Ист Ривер, додавајќи дека со Кина се воделе тешки преговори за текстот на декларацијата, затоа што оваа постојана членка на СБ на ОН го поддржува Мјанмар.
Дипломатот додаде дека кинеските власти сметаат дека ситуацијата во Мјанмар е внатрешно прашање на оваа земја.