Советот на министри за надворешни работи на ЕУ, преку видео-конференциска врска,  на 19 април ќе расправа за сите аспекти на ситуацијата во Украина. На состанокот ќе бидат опфатени и прашањата за руските ограничувања за бродската пловидба во некои области од Црното Море, во близина на Крим, изјави портпаролот на ЕУ за надворешна политика Питер Стано.

-Министрите в понеделник ќе разговараат за сите аспекти на ситуацијата, вклучувајќи и за последната изјава на Русија за ограничување на пловењето, рече Стано на денешниот редовен брифинг.

Според него, ЕУ нема јавно да ја разгледува можноста за воведување нови санкции кон Русија, туку прашањето за зајакнување или намалување на ограничувањата ќе се дискутира зад затворени врати.

-Ние никогаш не разговараме за процесот на подготовка на нови санкции. Сите постојни режими се разгледуваат и секогаш постои можност да се прошират или намалат доколку престане злонамерната активност и веќе нема никаква основа за нив. Доколку решиме да воведеме нови санкции, никогаш тоа нема да го коментираме јавно. Оваа постапка е затворена , рече Сатно на прашањето дали ЕУ има намера да покаже солидарност со САД за воведување ограничувачки мерки против Москва.