Сопругата на озлогласениот мексикански нарко-бос Хоакин Ел Чапо Гузман се изјасни за виновна по голем број обвиненија, вклучително и за трговија со дрога.

Триесет и едногодишната Ема Коронел Аиспуро пред судот во Вашингтон призна дека и помогнала на Гузман да го води нарко картелот Синалоа и да избега од затвор во 2015 година.

Може да добие доживотна казна затвор и парична казна до десет милиони долари.

Шеесет и тригодишниот Гузман во моментов издржува доживотна казна затвор во Колорадо за трговија со дрога и перење пари.

Властите велат дека картелот Синалоа бил најголемиот снабдувач на дрога во САД.

Коронел Аиспуро се појави на суд во зелен комбинезон и со бела маска за лице, за да му даде изјава на американскиот окружен судија Рудолф Контрерас.

Таа се изјасни за виновна по три точки од обвинението – за поврзаност со цел продажба на наркотици, перење пари и учество во финансиски работи на наркокартелот Синалоа.

Таа склучи договор за признавање вина, а исто така призна дека била соучесник во бегството на Ел Чап од затвор во 2015 година.