Соопштени добитниците на државната награда „8 Септември“
Државната наградата „8 Септември”, со која се оддава признание на спортисти, тренери и спортски работници за остварувања во областа на спортот, беше најавена во Агенцијата за млади и спорт на прес конференција на која присуствуваше директорот на АМС Дарко Каевски и претседателот на одборот за награди Ленче Алексовска Величковска.
– Осми септември 1991 година е длабоко врежан во меморијата на нашиот народ. Симболот на независноста на нашата држава недвосмислено кореспондира со крајната цел на секој спортист, а тоа е победата. Денешниот празник е прослава на победата, а токму таа е мотив на спортистите и спортските работници – изјави Каевски.
Тој додаде дека државната награда за спорт „8 септември” претставува благодарност од страна на државата до сите оние кои преку спортот успеаа да ја промовираат Македонија и да постигнат високи резултати на меѓународно поле во име на државата. Сакам оваа можност да ја искористам и да упатам благодарност до претседателката и до членовите на одборот за доделување на државната награда и да ве поканам на свечената промоција на доделувањето, кое ќе се случи во собранието на Македонија во недела 8 септември со почеток во 11.00 часот – додаде директорот на Агенцијата за млади и спорт.
– Оваа година одборот за награди немаше воопшто лесна задача, во одлуката за доделување на петте награди, од кои една награда е за животно дело за исклучителен придонес во развојот на спортот, афирмација и промоција на Македонија на меѓународен план – се зборовите на претседателот на одборот за награди, Алексовска-Величковска.
Носители на престижната награда во 2019 година се:
– Томе Коцев, доајен во борењето;
– Слободан Николиќ, еден од најтрофејните спортски доктори;
– Атанас Николовски, еден од најдобрите македонски кајакари;
– Кочо Димитровски, македонска фудбалска легенда;
– Драган Стојановски, претседател на Карате федерацијата, наградата за животно дело за исклучителен придонес за развој и афирмација на спортот во Македонија.