Сончаница и топлотен удар: Како да се заштитите?

Главни непријатели на нашиот организам во летниот период се сончаницата и топлотниот удар, кои последниве години се во значителен пораст поради климатските промени и глобалното затоплување.

Подолго изложување на главата на сонце, особено директна изложеност на висока температура, доведува до сончаница. Притоа температурата во главата значително се зголемува. Симптомите почнуваат со силна главоболка и со зголемување на телесната температура. Често можат да се појават поспаност и вртоглавица, зуење во ушите или краткотрајна загуба на слухот. Кај помладите кои долго се сончаат чести симптоми се умор и малаксаност, а кај постарите може да дојде и до несвестица.

Топлотен удар може да настане не само поради прекумерно изложување на сонце, туку и поради влажен и презагреан воздух, бидејќи во такви услови е отежнато потењето, а се јавува најчесто кај работници во пекарници, кујни, но и во презагреан автомобил, неклиматизиран јавен превоз.

Симптоми се силна главоболка, сува кожа, постојано зголемување на телесната температура, вртоглавица, немир, поспаност и повраќање, зуење во ушите, пореметување на видот.

При топлотен удар или сончаница, мора веднаш да се почне со разладување. Важно е постепено разладување со ставање ладни облоги сè додека температурата не се врати во нормала. Многу е важно да се надомести изгубената течност и минерали, да се даваат ладни напитоци, но да се избегнуваат пијалаци кои влијаат на крвотокот, особено кафе и алкохол.

Препораки на експертите

Пет чаши вода дневно се доволни за хидратација на деца од 5 до 8 години, седум чаши за деца од 9 до 12 години, а осум до десет чаши вода за деца постари од 13 години и за возрасни.

Јадете свежо овошје и зленчук, немасно месо и риба, житарки, семки и немасни ферментирани млечни производи (јогурт, кефир), чорби и супи за надоместување на електролитите изгубени со потењето.

Избегнувајте обилни оброци, масна храна која тешко се вари, засладени и газирани сокови, алкохолни пијалаци и пијалаци богати со кофеин поради опасност од дехидрација на организмот.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот