Солта мора „под клуч“ – го слабее и го загрозува имунитетот
Во времето кога сите зборуваат за имунитетот и за неговото зајакнување со сите средства, веста од Берлин на многумина ќе им даде дополнителен материјал за размислување за она што го внесуваат преку храната во своето тело.
Д-р Сабрина Гејсбергер и нејзините колеги од Берлинскиот институт за медицински системи на биологија (БИМСБ) објавија труд во списанието „Циркулација“, кој покажува дека прекумерното солење на храната може да го „ослаби имунитетот“. Ова, се разбира, значи поголема подложност на болестите.
Секако, прва работа на која ќе помислите е кардиоваскуларниот ризик. Но, бројни студии покажаа дека солта може да влијае и на имуните клетки на многу начини.
Дека премногу сол не е добро за здравјето, особено за срцето и за крвниот притисок, е добро познато, но оваа студија се осврна на темата што особено се наметнува во времето на коронакризата.
Научниците сакале да добијат поширок увид во ефектите на солта на организмот и подобро да ги разјаснат наодите од студијата направена во 2015 година, која покажала дека високите нивоа на натриум во крвта влијаат на одговорот на одредени бели крвни клетки на „неуспесите на системот“. Тогаш научниците заклучиле дека „тие сè уште не знаат што се случува во клетките“.
Во новата, берлинска студија, тимот го испитал „метаболизмот на имуните клетки кои биле изложени на високи концентрации на сол“. Откриле дека солта влијае на имунитетот нарушувајќи го т.н. респираторен синџир, предизвикувајќи клетките да произведуваат помалку аденозин трифосфат (ATП), универзално гориво кое ги движи клетките, обезбедува енергија за мускулите и го регулира метаболизмот. Значи, ако високите нивоа на сол во телото предизвикуваат послабо производство на АТП, тоа може да влијае на созревањето на клетките на имунитетот и на нивната функција.
Ако, пак, толку важен клеточен механизам е нарушен подолго време, тоа може да има многу негативно влијание врз имунитетот во секоја смисла, почнувајќи од заштитата од надворешните напаѓачи, како што се вирусите и бактериите. Исто така, постои зголемен ризик од развој на воспалителни болести на крвните садови и зглобовите, како и од автоимуни болести.
Затоа експертите уште еднаш препорачуваат дневниот внес на сол секако да се намали на помалку од шест грама. Во таа грамажа секако треба да се вкалкулира и солта што се крие во преработените прехранбени производи.