Солскјер: Сега сме на дното, ова е најмрачниот ден откако го водам клубот!

Оле Гунар Солскјер ја презема одговорноста за високиот пораз од Ливерпул/Манчестер, Велика Британија/24 октомври 2021/Фото: EPA-EFE/PETER POWELL

Фудбалерите на Манчестер јунајтед забележаа рекордно висок пораз од Ливерпул на својот стадион, а одговорноста за виденото на натпреварот кој заврши 5:0 за гостите ја презеде менаџерот на тимот Оле Гунар Солскјер.

– Тешко е да се каже нешто повеќе од тоа дека ова ми е најмрачниот ден откако ги водам овие играчи. Не бевме добри ниту поединечно ниту како тим.

Не може да му се даваат такви шанси на Ливерпул, а ние, за жал, им ги дадовме. Ништо не беше добро. Ние создававме шанси, а тие ги реализираа своите. Третиот гол го реши натпреварот, по четвртиот истиот беше завршен – рече Солскјер по мечот.

Навивачите после овој срамен пораз побараа Норвежанецот да си замине од „Олд Трафорд“. Солскјер е свесен за лавината критики, признава дека вечерва дебаклот е негова одговорност.

ВИДЕО: Оле „аут“, навивачите не може повеќе да го гледаат срамот на Манчестер јунајтед

– Чија е оваа одговорност? Моја. Тренерскиот штаб е многу добар, одличен, но јас сум тој што одлучува за пристапот на натпреварот. Минатата сезона загубивме од Тотенхем со 6:1, но ова е многу, многу полошо.

Треба да се тргнеме по ова што е можно поскоро. Ќе биде тешко, но имам карактерна екипа. Сега сме на дното, не можеме да се чувствуваме полошо од ова и ќе видиме што ќе се случи понатаму – вели менаџерот на „црвените ѓаволи“.