Солидната театарска продукција во пандемиската година ќе биде прикажана на 55. МТФ „Војдан Чернодрински“
Македонскиот театарски Фестивал „Војдан Чернодрински“ во своето 55. издание ќе се одржи од 1 до 8 октомври во Прилеп. Фестивалот ја соопшти програмата и годинашните добитници на наградата за животно дело – актерите Емил Рубен и Борис Чоревски и сценографот Крсте С. Џидров.
На 1 октомври, на сцената на Центарот за култура „Марко Цепенков“, фестивалот ќе биде отворен со доделувањето на наградите за животно дело и со првата претстава во конкуренцијата за награди, претставата на Македонскиот народен театар од Скопје со „Мој термин“ во режија на Синиша Евтимов, според мотивите на Лорен Бафи и на Винсенте Виљануева.
На 2 октомври ќе биде промовирана книгата на Тена Штивичиќ, „Невидливите“, а на програмата се уште две претстави во конкуренција: „Вечера за глупаци“ од Францис Вебер во режија на Ирена Стеријовска, а во продукција на „Театар Комедија“ од Скопје, и претставата „Глембаеви“ од Мирослав Крлежа во режија на Бранко Брезовец на НТ „Војдан Чернодрински“ од Прилеп.
На 3 октомври ќе бидат изведени претставите на „Вообразен болен“ од Молиер во режија на Драган Гунин на Кумановскиот театар, како и „Мојот маж“ од Румена Бужаровска во режија на Нела Витошевиќ на Драмскиот театар од Скопје.
На 4 октомври ќе се одржи трибина на тема „Театарот во ковид-19. Проблеми и решенија“, а со претстави ќе настапат Албанскиот театар од Скопје со „Мурлин Мурло“ од Николај Кољада, во режија на Кристина Димитрова, и „Херои 04:33“ од Сашо Димоски во режија на Деан Дамјановски од Велешкиот театар.
Тетовскиот театар со претставата „Страст и алчност“ од Јуџин О’Нил во режија на Фитим Селими ќе настапи на 5 октомври, а истата вечер е и претставата „Едип коментари“ според мотиви од Едип на Софокле во режија на Драгана Милошевски Попова, а во продукција на Штипскиот театар.
На 6 октомври ќе има промоција на книгата „Горан во Драмски“ и уште две претстави во конкуренција: Турски театар од Скопје ќе ја изведе „Славната Флоренс“ во режија на Драгана Милошевска Попова, а потоа е претставата на Охридскиот театар „Крик за љубов“ во режија на Љупчо Ѓоргиевски.
На 7 октомври се планирани три претстави: Театарот за деца и младинци од Скопје со „Едвард раце ножици“ во режија на Нела Витошевиќ, Битолскиот театар со „И коњите ги убиваат, зар не?“ во режија на Мартин Кочовски и Факултетот за драмски уметности со „Мурлин Мурло“, дипломска претстава на студентите од отсекот Драмски актери кај професорите Сузана Киранџиска и на Кристина Леловац.
На 8 октомври жирито во состав Ѕвездана Ангеловска, актер и режисер, Бајруш Мјаку, актер, и Александар Милосављевиќ, театролог од Србија, ќе ги соопшти најдобрите остварувања на 55. МТФ „Војдан Чернодрински“. Свеченото затворање на фестивалот ќе биде со доделувањето на наградите на најуспешните и со изведбата на перфотмансот „Драмски за Конески“, во чест на наградените.
(Текстот е објавен во „Културен печат“ број 98, во печатеното издание на весникот „Слободен печат“ на 25-26 септември 2021)