Софија „натиска“, ама не дава да плачеме!?
Како што се приближуваат изборите во Бугарија, така се вжештуваат и изјавите на бугарските политичари, според кои во Македонија не смее да постои емотивна реакција на нивната уценувачка политика – по европратеникот Андреј Ковачев, вчера и министерката за надворешни работи Екатерина Захариева реагираше на изјавата на премиерот Зоран Заев со оценка дека „односите се затегнати и сите треба да ги смириме емоциите“.
Според аналитичарите, македонскиот државен врв добро и одмерено се држи кон навредливата политика на источниот сосед и така треба да продолжи, а очекувањата се дека по нивните избори во април е можен исчекор.
Премиерот Заев во понеделникот рече дека Бугарија со блокадата на Македонија кон ЕУ зазела „не баш пријателска позиција“, нивниот став кон македонскиот јазик и идентитет го оцени како „анахрон“ и спротивен на меѓународното право и нагласи дека очекува решение по изборите. Захариева вчера му одговори дека „ова е уште еден пример дека треба да бидеме поумерени во употребата на епитети“.
– Принципиелно ли е да воспитуваш генерации по генерации со омраза кон соседната држава и целиот нејзин народ? Дали е многу принципиелно да се обидуваш да ја искривиш позицијата на Бугарија? Проблемот е дека се негува омраза кон Бугарите, дека не се исполнува Договорот за добрососедство. Не може во 21 век да продолжуваат овие форми на дискриминација – рече Захариева и повтори дека Бугарија сака да ја види Македонија во ЕУ.
– Тоа што сите нѐ прашуваат е зошто да не започнат преговори, а во самиот преговарачки процес да се решат проблемите? Само што не може сѐ да се решат за еден ден, емотивни се. Ние сакавме неколку чекори пред процесот за одобрување за ЕУ – рече Захариева за бугарската Нова ТВ.
Завчера, пак, европратеникот Ковачев му порача на Заев да не се надева на преговори и компромиси „со толку обвинувања, лаги и омраза кон Бугарија“ и ја потенцираше надмоќта на неговата земја како членка на ЕУ над Македонија како земја кандидат.
Аналитичарот и претседател на организацијата Евроатлански совет на Македонија Исмет Рамадани смета дека нашиот пристап кон Бугарија е логичен, а бугарскиот кон нас е нелогичен и неприфатлив.
– Нашиот одговор на бугарската политика е со евроатлански стандарди и таков треба да остане. Ние добиваме поддршка од ЕУ и од САД за нашето однесување и за нашата политика, која се покажа како позрела од политиката на една членка на Унијата. Може да покажеме и разбирање за нивниот предизборен период и кампањата што се води, но, бугарските политичари треба да се коригираат. Ние треба да опстоиме на нашиот начин на водење на политика кон Бугарија и на дневно ниво и во перспектива и да ја следиме поддршката што ја добиваме од САД и од ЕУ, со тоа што секако во едно догледно време Македонија ќе ги добие заслужените преговори – вели Рамадани за „Слободен печат“.
Додава дека е нормално што позициите на Бугарија кои навлегуваат во идентитетот будат емоции и кај политичарите и кај граѓаните, а потоа претеруваат со реакциите на добиените одговори.
– Тие задираат длабоко во некои прашања како јазикот и идентитетот на граѓаните и што е многу, многу е. Според нивното гледиште, премиерот Заев излегува виновен што го брани она што е најсветото и најбитното за народот, а тоа е идентитетот и јазикот – вели Рамадани.
Скопје да се откаже во ОН од „малцински претензии“!?
Поранешниот министер за надворешни работи на Бугарија Даниел Митов смета дека следната година е можен компромис меѓу Македонија и Бугарија, но „за тоа е неопходен јасен дипломатски чекор за клучните прашања од македонска страна во Светската организација“.
– Скопје не само што преку својот премиер треба да декларира дека нема никакви територијални и малцински претензии кон Бугарија, туку и да направи дипломатски демарш во таа насока. Каде? На пример, во ООН – рече Митов во интервју за ТВ Европа.