Мерките на ЕУ за патувањата со авиони во текот на пандемијата од коронавирус вклучуваат носење заштитни маски и од страна на персоналот и од патниците.

Останатите мерки, како социјално дистанцирање, се уште не се потполно утврдени, а тоа би можело драстично да ги зголеми трошоците на патувањата, и така да ги загрози и авиопревозниците и патниците.

Мерките и советите се јасни, маските се задолжителни, се ставаат штом ќе се стапне на аеродром, а се отстрануваат кога се пристигнува до одредиштето. Ваквата мерка е неопходна за да се зачуваат животите, и за да не дојде до циркулирање на вирусот. Исклучок од ова правило се децата помлади од 6 години.

Освен тоа, маските мора да се менуваат на секои 4 часа од хигиенски причини, па ЕУ им советува на патниците да понесат доволно маски со себе.

ЕУ исто така советува едно седиште во редот да остане празно и правилото за дистанца да се почитува што е можно повеќе, додека услугата во авионите би требало да биде сведена на минимум.

ИАТА, Меѓународното здружение за воздушен сообраќај, ги отфрла барањата за одржување на социјална дистанца и предупредува на неминовно зголемување на трошоците. Воведувањето на задолжителна дистанца во авионите меѓу патниците би ја сменило економијата на авиосообраќајот, а резултатите би биле: значително поскапи авионски карти кои директно би го загрозиле авиосообраќајот и авиокомпаниите, посебно нискобуџетните и секако патниците.

Во меѓувреме, некои компании веќе започнаа да дизајнираат авионски седишта кои би спречиле ширење на заразата.

Светот се менува – Можно е вака да изгледаат седиштата во авионите по пандемијата на коронавирусот (ФОТО)