Сочни и едноставни за подготовка: Кофтиња од мисиркино месо и грав
Мисиркиното месо во комбинација со растителен протеин како што е гравот формира совршена смеса за да подготвите најразлични специјалитети. Од нутритивен аспект гравот може да се вброи во т.н. супер-храни. Тој освен што е богат со макронутриентите како протеини и јаглехидрати, богат е и со растителни влакна, а содржи и низа на микронутриенти, вклучително: магнезиум, железо, фолна киселина, витамин В6 и многу други.
Состојки:
– 300 г мисиркино мелено месо
– 200 г грав
– 1 главица кромид
– 2-3 печурки
– свеж магдонос по вкус
– 2 чешниња лук
– 1 лажица путер
– сол и црн пипер
Подготовка:
Гравот потопете го преку ноќ, па следниот ден сварете го во малку посолена вода и оставете го да се излади. Во блендер ставете го гравот, додајте му ги путерот, сечканиот кромид, печурките, лукот и изблендирајте да се сомеле ситно. Потоа додајте му го меленото месо и магдоносот па кратко блендирајте да се соединат состојките. Префрлете ја смесата во сад и од нејзе земајте порции по желба, обликувајте ги во ќофтиња или плескавици, па пржете ги во врело масло.