Откако доцнеше почетоко на собраниската седница каде требаше да се расправа за предлог-законот за Јавно обвинителство и Предлог-законот за Советот на јавни обвинители, поради критиките и забелешките од пратениците, претседателот на Собранието Талат Џафери ја презакажа за утре во 11 часот.

Двата закона вчера поминаа во Комисијата за европски прашања и во матичната Законодавно-правна комисија.

За доцна свиканата седница, Џафери рече дека работи по Устав, а според Уставот, Собранието е во постојано заседание.

– Ако ви се спие одете спијте. Но за чекањето самите координатори си ги знаете работите – рече Џафери.

Тој им порача на пратениците дека не комуницира преку Фејсбук, откако вечерва пратеникот на СДСМ Александар Кирацовски преку Фејсбук му порача веднаш и сега да закаже седница за разрешувањето на министерката за труд Рашела Мизрахи.

Двотретинско мнозинство е потребно за законот за ЈО, кој не е официјален  услов за добивање датум за почеток на преговори со ЕУ, но сепак од високите европски претставници се споменува како позитивен сигнал кој би можел да го придвижи процесот.