Собранието усвои План за унапредување на родовата сензитивност

Планот предвидува повеќе активности за родово сензибилизирање на Парламентот, како родово сензибилизирано законодавство, управувањето со човечките ресурси, алатки за собраниските служби за да можат да го гарантираат тоа, а меѓу најважните е родовото буџетирање.

Членовите на Собраниската Комисија за еднакви можности на мажите и жените денеска усвои План за активности за унапредување на родовата сензитивност на Собранието на Република Северна Македонија 2020 – 2021, оставајќи им аманет на пратениците од следниот состав да ги спроведат активностите предвидени со Акцискиот план.

Општ заклучок е дека Македонија е лидер по регионот и пошироко по прашањето на родова сензитивност, но оти, како што рече, генералната секретарка на Собранието Цветанка Иванова на денешната јавна расправа „не сме толку убави во огледалото како што се гледаме ние самите”.

– Треба уште многу да се направи за да се каже дека имаме родова сензитивност. За ова е потребна политичка волја, поддршка од меѓународните организации, како и од службата во Парламентот, рече Иванова.

Таа, како и повеќе други пратенички и претставнички на граѓанскиот сектор, уште еднаш ги повика жените политичарки и нивните колеги да се лобираат и силно да се заложат за предлогот 50:50, односно жените на парламентарните листи, но и на локалните избори да бидат подеднакво застапени како и мажите. Исто така дел од пратеничките сметаат дека треба да се води сметка не само за застапеноста туку и за квалитетот на кандидатите што се на листите без разлика дали станува збор за мажи или за жени.

Планот предвидува повеќе активности за родово сензибилизирање на Парламентот, како родово сензибилизирано законодавство, управувањето со човечките ресурси, алатки за собраниските служби за да можат да го гарантираат тоа, а меѓу најважните е родовото буџетирање.

Иванова рече дека во делот на службите, сега кога ќе се донесе Законот за Собрание, ќе се изготви нова систематизација во која ќе има предвидено работно место советник за родово законодавство.

Планот предвидува исто така еднаш годишно да се одржува пленарна сесија на која ќе се дебатира за прашања поврзани со родова сензитивност, а исто така е предвидено воведување годишна награда за достигнувања за овие прашања.

Претседателката на Комисијата за еднакви можности на мажите и жените Даниела Рангелова рече дека иако 38,3 отсто од пратениците во Собранието во овој состав се жени, кај нив недостасува родова сензитивност и оти им е потребна поголема храброст за да делуваат во своите средини и партии.

– Моја желба е, рече таа, да се исполни квотата 50:50.

Рангелова им остави аманет на пратениците од следниот состав во однос на зголемување на ингеренциите на Комисијата за еднакви можности, која нема право да организира надзорни расправи ниту да разгледува закони кои се поврзани со прашања за еднакви можности.

Амбасадорот на ОБСЕ во Северна Македонија, Клеменс Која истакна дека од денешната сесија Планот ќе стане клучен стратешки план за родово сензибилизирање на Парламентот. Со помош на ОБСЕ беше изготвен Извештај за состојбата со родовото сензибилизирање во Парламентот со цел подобрување на ситуацијата и правилно дејствување во иднина.

Савка Тодоровска од Националниот совет за родова рамноправност побара од претставничките на политичките партии и на меѓународните организации да лобираат во политичките партии за да се постигне жените и мажите да бидат подеднакво застапени на листите за предвремените парламентарни избори.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот