Соблекувалната на Реал Мадрид поделена, кои играчи веруваат во Зидан, а кои сакаат негова смена
Тренерот на Реал Мадрид е под огромен притисок поради слабите резултати, а дел од соблекувалната му го врти грбот.
Вчерашниот пораз од Шахтјор во Лигата на шампионите ги возбуди страстите во Реал Мадрид и го стави тренерот Зинедин Зидан под неверојатен притисок да ги брои деновите од отказ доколку не победи на следните неколку натпревари.
Денеска главна тема на мадридските медиуми „Марка“ и „АС“ е соблекувалната на Реал Мадрид, односно кои играчи се на страната на Зинедин Зидан, а кои се незадоволни.
Имено, Зидан ја загубил поддршката од поголемиот дел од соблекувалната, помал дел од играчите останаа на негова страна, но поголем дел се против него.
Според медиумите, сенаторите на тимот како капитенот Серхио Рамос и Карим Бензема се најголеми поддржувачи на Зидан, а тука се и нивните луѓе од доверба како Варан, Каземиро, Валверде и Менди и неверојатно листата на поддржувачи тука завршува.
Дел од фудбалерите се рамнодушни, односно не заземаат страна како Марко Асенсио, Тони Крос и Лука Модриќ.
Против Зидан се Иско, Марсело кој го губи местото во првиот тим од Менди како и Бразилците Винисиус, Маријано и Родриго. Мартин Одегард кој летово се врати од позајмица исто така е незадоволен од малата минутажа како и Едер Милитао кој тотално е игнориран од тренерот.
Медиумите не се сигурни за Белгијците Тибо Куртоа и Еден Азар на чија страна се, но напоменуваат дека Зинедин Зидан е разочаран од Азар кој никако да влезе во форма и повеќе е на листата на повредени играчи отколку што е на теренот.
