Катерина Гогова е родена во 1989 година во Дојран. Авторка е на поетските книги „Актите се кастрирани“ и „Пад во немирна вода“ за која го доби признанието „Бели мугри“ за 2018 година. Нејзина поезија е застапена во списанија за литература, култура и уметност, зборници и онлајн едиции. Учествувала на повеќе поетски читања. Живее и работи во Скопје.

Овој свет заоѓа

На хоризонтот се ткајат

последни остатоци вечна музика,

таму, со едно затворање на очите

може да се здогледаат

прашумите низ правековите,

тенки ластари лимонова трева

шепотат како да знаат

и овој свет до кога ќе биде тука,

до кога бубалки и жерави ќе им прават друштво

во оклопните мечтаења за нови лета.

Пустинскиот ветар се лишува

од последните песочни дини,

така сонува само зелени заливи и баобаби.

И за неколку капки вода,

ледените карпи жртвуваат снегови,

мапите тонат во нова географија,

многу празни тела во ровката земја

и црви.

гласни предвесници,

светот сонува приказни.