Со старите кеси од дома се пазарува во маркетите

Пластични ќеси за пазарење 5
Пластични ќеси за пазарење - фото: Драган Митрески - Слободен печат

Од пазарување во „Кам“ луѓе излегуваат со кеси брендирани од „Веро“, „Рамстор“, „Тинекс“, и обратно. Некои, пак, си носат  платнени торби. Сите велат дека 15 денари се премногу за да се потрошат за една обична кеса

Вчера започна забраната за продажба на пластични кеси. Маркетите имаат обврска да продаваат исклучиво биоразградливи кеси, кои на потрошувачите им ги наплатуваат 15 денари. Висината на цената на кесите ги натера граѓаните да одат на пазарување со веќе искористени кеси, кои си ги носат од дома.

Од пазарување во „Кам“ луѓе излегуваат со кеси брендирани од „Веро“, „Рамстор“, „Тинекс“, и обратно. Некои, пак, си носат платнени торби. Тие велат дека 15 денари се премногу за да се потрошат за една обична кеса. Има и такви што не веруваат дека денешните кеси се поразлични од тие што во маркетите се продаваа до завчера.

– Искрено да ви кажам, мене кесите ми изгледаат исто, не гледам разлика од овие кеси што денеска ги продаваат 15 денари, во споредба со тие што вчера беа еден денар или два. Висока е цената, но ако мораме, ќе се навикнеме, кој има пари одвишок ќе си ги купува, кој е поекономичен ќе си носи торби од дома – вели еден од граѓаните што го сретнавме денеска.

Некои од нашите сограѓани, како што објаснуваат, си направиле залихи на кеси, па ќе имаат одреден период.

– Си купив кеси за пазарување додека беа поевтини. Ќе имам за некое време, потоа ќе си купам торба и како порано, во шеесеттите години, па пазар ќе одам со торба. Сè е до навиката, ќе се навикнеме и на ова – вели нашиот сограѓанин.

Сепак, сите се согласуваат дека цената на кесите е премногу висока.

– Ако треба да купам неколку кеси, тоа ќе ме чини сто денари. Јас месо не јадам, што значи со тие пари ќе можам два дена да јадам ручек со зеленчуци – дополнува една од анкетираните.

Граѓаните ќе треба да платат по 15 денари за едно пластично кесе и доколку не сакаат в раце да ги носат доматите, пиперките или јаболката. Најголеми реакции за таканаречените пиљарски кеси доаѓаат од постарите лица, кои најчесто купуваат на парче зеленчук или овошје. Дел од купувачите прашуваат каде е математиката ако за „две-три главици кромид, што чинат 10 денари, треба да платат 15 денари“?

Од Организацијата на работодавачите за „Слободен печат“ велат дека до нив стигнале поплаки од трговците за таквите кеси, па оттука и нивниот став е дека е неопходна измена во Законот за управување со пакување и отпад од пакување, или одложување на неговата примена.

– Иницијативата е започната од причина што примената на овие кеси е многу ограничена (станува збор за мали количества кеси), односно се работи за кеси што се користат за мерење овошје и зеленчук и во овој краток период компаниите од трговијата  имаат проблем за воведување на нивна замена – велат од ОРМ.

Тие сметаат дека треба да се одложи нивната примена до 1 јануари 2023 година или да се промени став 1 од член 10 и да гласи:   се забранува пуштање пластични кеси за носење на стоки на пазарот во Република Северна Македонија, со исклучок на многу лесните пластични кеси за носење стоки (кеси за овошје и зеленчук – кеси за размерување на рефусна стока).

Министерот за животна средина Насер Нуредини им порача на граѓаните да користат платнени торби за пазарување, појаснувајќи дека за кесите за ѓубре засега нема промена на цената.

Инспирирани од новиот закон за намалување на употребата на пластични кеси, учениците од специјалното основно училиште „Златан Сремец“ изработиле платнени торби, а продажбата ќе биде наменета за набавка на дидактички материјали за  децата.

Видео на денот