Со скок од четврти кат во смрт: Обвинителството во Тирана отвори истрага по новото самоубиство во Ковид центар
Обвинителство во Тирана почна истрага во врска со самоубиството на двајца пациенти со фрлање од болницата „Шефќет Ндроќи” која функционира како Ковид центар, јави дописничката на МИА од Тирана.
Истрагата почна по синоќешниот инцидент, кога 65 годишен пациент со Ковид-19 се самоуби со фрлање од четвртиот кат на болницата. Првиот случај, пак, е од 13 август кога се самоуби 29 годишен пацинет од Драч, кој скокнал од третиот кат на болницата.
– Обвинителството почна истрага по обвинувањата за лекарска негрижа, за што постои запис од телефонски разговор, каде 65 годишниот пациент на свој близок му се жали за она што го видел и доживеал во болницата и дека да знаел што го чека никогаш не би дошол, пренесува агенцијата „Балкан веб“.
На роднината му кажува дека телефонот го обезбедил од друго лице на кое за тоа му платил одредена сума пари и оти има само пет минути за разговор.
„Топ чанел“ ТВ уште пренесува дека и двајцата пациенти биле во тешка психолошка состојба, што барало дополнителна грижа. Обвинителството веќе ги подигнало болничките картони на двајцата паценти и се води истрага како се третираат пацентите во оваа болница. Лекарите кои синоќа биле на должност дале изјави во полиција.
Во оваа и Инфективната клиника моментно хоспитализирани се 185 пациенти заразени со Ковид-19, при што 22 се на интензивна терапија, а осум се интубирани.