Со работилница за сценарио под водство на Дејан Дуковски почна филмскиот фестивал во Галичник
Третото издание на „Галичник филм фестивал“, кој полека го издигнува Галичник на едно повисоко културно рамниште, се одржува од 3 до 7 август во Галичник.
– Повикувајќи се на традицијата за филмски проекции во старото кино за кои неуморно ни раскажа дедо Гапе, за тоа како со магариња од Јанче се носеле филмските ленти, за тоа како кровот во старото кино татне да чуе макар уште еден галички аплауз за некој нов филм, организаторите ве канат вас драги галичани да бидете и гости и домаќини на претстојниот фестивал! – посочуваат од МЗ Галичник.
На филмската програма на фестивалот прво ќе можат да се проследат проекции на краткометражни филмови на Упија на 5, 6 и 7 август, а потоа ќе следува избрана музичка програма со концерт на Ѓорѓи Шарески и Јане Трајковски, како и диџеј-сетови на Гоце САФ и Зоки Бејбе.
Фестивалот почна на 3 август со „Екс – ЈУ“ работилницата за краткометражни сценарија под водство на драмскиот автор и драматург Дејан Дуковски, која ќе трае до 5 август, а учество ќе земат четири филмски проекти во развој од кај нас и од регионот.