Изминатиов период на фејсбук страната на македонската телевизија Канал 5, можеше да се забележи говор на омраза, кој доаѓа од бугарски профили. Министерството за внатрешни работи го истражува случајот.

Освен кон медиумот навредите се упатуваат и на адреса на македонските и албанските граѓани. Голем дел од нив доаѓаат од фејсбук профил со име Николај Којчев со бугарска IP адреса.

Полицијата најави дека ќе ги истражи сите околности по што ќе го извести и Јавното обвинителство кое ќе треба да даде понатамошни инструкции за постапување.

-Најпрвин ќе се чека потврда за автентичноста на фејсбук профилот на име Николај Којчев по што доколку се утврдат елементи на кривично дело ќе бидат известени бугарските власти- рече портпаролот на МВР, Тони Ангеловски за Канал 5 Телевизија.