Состојбата со епидемија во Словенија од ковид-19, што беше прогласена на 18 октомври лани, при вториот бран, веќе нема да се продолжува, изјави денеска Франц Виндишар, државен секретар во Министерството за здравство.

Бидејќи Словенија се уште не е во безбедната „зелена” зона, според критериумите на Европскиот центар за контрола на болести (ECDC), во сила остануваат заштитните маски во затворен простор, дезинфекцијата на рацете, физичката дистанца и некои други мерки, а присуството на некои групни настани е можно само за вакцинираните, оние кои прележале ковид-19 или лицата кои ќе обезбедат нов негативен ПЦР тест.

Според последните податоци, во словенечките болници има 122 пациенти, што е најмала бројка од 7 октомври, а владиниот стручен тим ќе продолжи еднаш неделно да ја разгледува епидемиолошката состојба и во зависност од ситуацијата, ќе предлага препораки поврзани до Ковид-19.

-Ги замолувам сите да продолжат да ги следат препораките. Сите мерки остануваат во сила се додека владата не ги укине или не го продолжи нивното траење, рече Виндишар, повикувајќи ги  сите граѓани да се вакцинираат, што е најдобар начин да се постигне посакуваната масовна заштита од болеста, додавајќи дека сега има доволно вакцина во земјата.

“Зад нас е една тешка 1,5 година. Епидемијата не стави пред многу искушенија. Ќе ги надминеме со соработка и солидарност, но се уште не сме ја минале целта”, кажа Виндишар.