Сликовницата „Невидливата куќа“ има приказна со современа тематика
Првиот соавторски проект на Билјана С. Црвенковска и Ване Костуранов својата промоција ја имаше на 6 септември, во паркот пред КИЦ-Скопје.
Со наслов „Невидливата куќа“, во сликовницата е раскажана приказна за тоа како имагинацијата помага во справувањето со тагата и загубата, и е меѓу ретките современи книги за деца и млади во Македонија, која се занимава со приказните на бегалците од источните земји.
Во својата рецензија на книгата промоторката Лени Фрчкоска, меѓу другото, посочи: „Станува збор за комплексно, а едноставно срочено, современо четиво за деца меѓу пет и девет години. Приказната е за малата Кала, која со своето семејство бега од војна, веројатно некаде на Блискиот Исток. Исплашена од постојаното талкање, разделбите и тешките последни прегратки, смртта и стравот, изгубена во реките луѓе кои бегаат, наоѓа спас во ’невидливата куќа‘. Текстот на приказната во сликовницата укажува дека авторите ја сфатиле одговорноста на писателот пред интелигенцијата и капацитетот на детето да сфати комплексни современи прашања, а има почит и кон политичноста на детето и за круцијалната важност на квалитетното образование“, напиша Фрчкоска.
Билјана С. Црвенковска е писателка, сценаристка, преведувачка, сонувачка (или мечтателка, како милувате), вљубеничка во природата, планините, животните и облаците, и – вечно дете.
Ване Костуранов е човек што поголемиот дел од животот го поминува измислувајќи нешто. Понекогаш тоа се нови слики, а понекогаш измислува и црта сликовници за деца. Толку е заигран во овој свет, што веќе нацрта три авторски сликовници („Ѕвездено дете“ 2018, „Девојче и мече“ 2019 и „Девојчето и градот“ 2020).
(Текстот е објавен во „Културен печат“ број 96, во печатеното издание на весникот „Слободен печат“ на 11-12 септември 2021)