Сликовницата „Невидливата куќа“ е објавена на германски јазик
Сликовницата „Невидливата куќа“ на Билјана С. Црвенковска со илустрации на Ване Костуранов деновиве е објавена на германски јазик, во издание на „Драгонфлај ферлаг“, дел од групацијата „Харпер Колинс“.
Првпат објавена од страна на ИД-Концепт консалтинг и дизајн (Издаваштво „Чудна шума“) од Скопје, сликовницата е наменета за децата, но и за возрасните. Нејзината исклучително важна и актуелна тема – миграцијата и животот на децата што остануваат без своите домови, особено изразена со војната во Украина, нејзината емотивна и поетична приказна и исклучителните илустрации на Костуранов, ги препознаа повеќе издавачи во Европа.
Сликовницата наскоро треба да биде објавена и во Словенија, во издание на „Содобност интернешнал“, и во Хрватска, во издание на „Ибис графика“.
Во пресрет на германското издание на „Невидливата куќа“, германската писателка за деца и млади Изабел Абеди напиша: „Постојат книги што содржат многу повеќе од приказна. Ова е една од нив. Таа го покажува она што е неуништливо, она што не може да биде изгубено сѐ додека постоиме“.
„Невидливата куќа“ ја освои првата награда за најдобра книга за деца и млади меѓу два саема на книга во 2021 година – признание што го доделува Македонската асоцијација на издавачи.
(Текстот е објавен во „Културен печат“ број 139, во печатеното издание на весникот „Слободен печат“ на 30 јули – 2 август 2022)