„Поетри слем Македонија“ на 30 август, со почеток во 19 часот, ќе го промовира Зборникот на националниот слем од 2020 година. Настанот ќе се одржи под покровителство на Град Скопје и во организација на Домот на културата „Кочо Рацин“ – Скопје.

На промоцијата ќе присуствуваат застапените автор(к)и кои земаа учество на Десеттиот јубилеен национален слем-натпревар, што се одржа на 10 октомври минатата година на летната сцена на НУ Центар за култура „Марко Цепенков“ во Прилеп.

Настанот ќе биде јавен, под отворено небо и добредојдени се сите намерни и случајни минувач(к)и. Публиката, односно минувач(к)ите заедно со слемер(к)ите ќе се движи од пред Домот на културата „Кочо Рацин“ – Скопје до Старата чаршија, каде на неколку попатни локации слемер(к)те ќе ја изведуваат својата поезја: Плоштадот, Камениот мост, Чаршијата и др.

На промоција на Зборникот ќе настапат Елена Пренџова, Перо Сарџоски, Марија Грубор, Цветанка Колева, Ирена Јурчева, Константин Карев, Марина Икономова Шокева, Горазд Китановски – Кени и Ива Дамјановски.

Од „Поетри слем Македонија“, исто така, известија дека како стипендист(к)и на европската програма за мобилност на творци во уметноста „и-Портунус“ (i-Portunus), преведувач(к)ите од македонски јазик Намита Субиото од Словенија и Давиде Фанчуло од Италија тековно остваруваат резиденцијален престој во Скопје.

Како дел од нивните програмски задачи и активности се препев на слем-поезијата на слем-изведувач(к)ите Елена Пренџова и Игор Трпчески – Трпче. Целта на нивниот престој е да ги премостат т.н. „спорни точки на преводот“ при препејувањето слем-поезија, процес кој поради природата на слем-поезијата не го инкорпорира само чинот на преводот, туку и обмислата дека, при преводот, потребно е да се задржи динамиката на изведувањето што е условена од јазикот и структурата на песната.

Намита Субиото е докторка на науки по македонистика и предава македонски јазик и книжевност на универзитетот во Љубљана, Словенија. Преведува од и на македонски и словенечки јазик, а меѓу македонските автор(к)и што ги превела се: Венко Андоновски, Јасна Котеска, Александар Прокопиев, Влада Урошевиќ и др.

Давиде Фанчуло е доктор по историја на лингвистиката. Живее во Софија, каде предава превод на Софискиот универзитет. Преведува од бугарски и македонски на италијански јазик, а пред две години ја преведе збирка раскази „Секој со своето езеро“ од Ненад Јолдески, добитникот на Наградата за литература на Европската унија во 2016 година.