Скршена гранка од бор два месеца никој не ја отстранува, Општината вети денеска ќе се сечела
Гранката на борот се скршила од тежината на снегот што одамна падна во Скопје и оттогаш до денес дел од станарите „тропаат“ на вратите на надлежните институции, бидејќи гранката удира во прозорецот на еден од становите на приземје и може да биде опасна доколку падне.
Денеска конечно треба да биде исечена гранката од дрвото, која два месеца е скршена и буквално пикната во прозорците на еден од приземните станови на зграда на улицата Томе Арсовски во Кисела Вода. Општина Кисела Вода вети дека денеска, и покрај тоа што тоа не било во нивна надлежност, ќе им помогне на граѓаните и ќе ја отстрани гранката.
Гранката на борот се скршила од тежината на снегот што одамна падна во Скопје и оттогаш до денес дел од станарите „тропаат“ на вратите на надлежните институции. Речиси вообичаено сите се прогласуваат за ненадлежни, а граѓаните сами не можат да ја отстранат гранката затоа што е надвисната над кабел на еден од операторите.
-Од последниот снег гранката се скрши и оттогаш удира во прозорецот на станот на приземје и прави сенка, а може да биде и опасна ако падне. Еве вака е два месеца. Се обративме во Општина Кисела Вода и тие не препратија во месната заедница „Бирарија“. Оттаму дојдоа, ама констатираа дека борот е во двор. Дворот не е приватен, тоа е државно земјиште, оградено е со жива ограда, затоа што приземните станови се многу ниски – вели една од станарките во зградата.
Таа објаснува дека се обидувала безброј пати да пријави за случајот и во Град Скопје, од каде никој не одговарал, а пријавила и во Телеком, затоа што гранката е натежната врз нивен кабел. Но, од никаде досега никој не се ангажирал да го реши проблемот.
-Кому да се обратиме веќе не знам? Никој не се наоѓа за надлежен, никаква одговорност. Па нели обврска на локалната власт е да се грижи и да се ангажира околу проблемите на граѓаните – револтирано вели таа.
По нашето инсистирање до Општина Кисела Вода да одговорат дали ќе преземат нешто во врска со проблемот и зошто дозволуваат како локална власт, наместо да помогнат, граѓаните да се чувствуваат беспомошни и да не знаат каде и кому да се обратат за помош, оттаму стигна ветувачки одговор: „И покрај тоа што отстранувањето на гранката не е во надлежност на Општината, Општина Кисела Вода денес ќе ја отстрани гранката“.