Според најновите податоци, во светот со новиот коронавирус досега се заразиле 5.447.674 лица. Од нив починале 344.773, а оздравеле 2.274.479 луѓе.

– Во изминатите 24 часа во БиХ се регистрирани само два нови случаја на коронавирус, соопшти Кризниот штаб на Федералното Министерство за здравство. Во БиХ денеска има најмал број на новозаразени во последните два месеца.

– Само два нови случаја на Ковид-19 беа регистрирани во Грција во изминатите 24 часа, со што вкупниот број се зголеми на 2.878 заразени лица. Од почетокот на епидемијата биле направени 153.963 тестови, 965 повеќе од вчера.

– Од анализирани 1.953 примероци во изминатите 24 часа, на Кипар биле регистрирани осум нови случаи на Ковид-19. Вкупниот број на заразени со новиот коронавирус се зголеми на 935 лица.

– По топлотниот бран, кој во претходните денови го зафати Израел, граѓаните на таа земја ќе мораат повторно во јавност да носат заштитни маски, со цел да се спречи ширењето на Ковид-19. Обврската за носење маски времено беше укината минатата недела по драстичното зголемување на температурата, но израелското Министерство за здравство денеска повторно ја воведе таа мерка.

– Пулмологот Бранимир Несторовиќ изјави дека создавањето вакцина против коронавирусот не оди најдобро, а онаа која ја подготвува компанијата на Бил Гејтс е многу лоша и не би ја прифатил. Тој истакна дека од 15 лица кои ја примиле, тројца имале тешки дејствија, а осум имале антитела.

– Во Хрватска во изминатото деноноќие потврден е еден нов случај на заразен со коронавирус, со што вкупниот број на заболени достигна 2.244 лица, а досега од последици на Ковид-19 се починати 99 луѓе, соопшти Националниот штаб за цивилна заштита.

– Во Австрија во изминатите 24 часа се регистрирани само 24 новозаразени случаи со коронавирус, со што продолжува добриот тренд, кој овозможува натамошно ублажување на мерките воведени поради пандемијата.

– Бројот на заразени случаи со коронавирус во Индија се зголеми за рекордни 6.767 во текот на изминатиот ден, достигнувајќи вкупно 131.868 лица, соошти индиското Министерство за здравство. Бројот на смртни случаи од Ковид-19 во изминатите 24 часа се зголеми за 147 и моментно изнесува 3.867 починати. Индија веќе трет ден по ред го урива рекордот по број на новозаразени случаи со новиот коронавирус.

– Во Србија денеска не е регистриран смртен случај од коронавирус, а потврдени се 68 новозаразени случаи. Досега во земјата вкупно се починати 238 лица, заразени 11.159, а излекувани 5.857 лица.

– По речиси повеќе од три недели, во Албанија денеска е регистрирана нова жртва од Ковид-19, со што вкупниот број на почнати се зголеми на 32 лица. Станува збор за 64-годишна жена од Тирана која боледувала и од мозочен лимфом. Во последното деноноќие од направените 146 тестови на сомнителни случаи, потврдени се девет новозаразени, со што вкупниот број изнесува 998 лица. Во списокот на оздравени се 789 лица или 79 отсто од вкупно заразените. Активни на болеста се 177, а болнички се лекуваат само 15, од нив четворица се на интензивна нега.