Според Протоколот за спроведување мерки за заштита од ковид-19 при организација на настани, донесен на 73-та седница на Владата, Дирекцијата за култура и уметност на Скопје, од 6 јули почнува програмата за 41. издание на фестивалот „Скопско лето“.

По официјалното објавување на конкретните мерки, препораки, протоколи и одобренија, „Скопско лето“ почнува со концертот „Скопје во три бои“ во објектот Сули ан, во 20.30 часот. Во програмата на фестивалот се предвидени концерти, изложби, театарски претстави, филмска програма и промоции на книги.

– Притоа, строго ќе бидат почитувани мерките и протоколите издадени од здравствените и државните институции за заштита од коронавирусот: задолжително носење заштитни маски, ограничен број публика соодветно на просторот, одржување физичко растојание, дезинфекција, онлајн продажба на влезници. Дирекцијата за култура и уметност на Скопје, како организатор на „Скопско лето“, има изработено соодветни протоколи за секој простор одделно. Ја замолуваме публиката за разбирање и да се придржува кон овие мерки и протоколи – потенцираат од Дирекцијата за култура и уметност.

(Текстот е објавен во „Културен печат“ број 38, во печатеното издание на „Слободен печат“ на 4-5 јули 2020)