Во рамки на триесет и деветото издание на интернационалниот фестивал „Недела на современ танц“ во Загреб, на сцената на „Загребачки плесни центар“, на 8 јуни ќе се изведат две кореографии на Скопје танцовиот театар, „Outline“ на Дејан Битровски, во која настапува Анастасија Данчевска, и „Не ми ги допирај очите“ на Адријана Данчевска. Станува збор за прво претставување на Скопје танцовиот театар на овој значаен фестивал.

Кореографот Битровски за делото „Outline“ вели дека е посветено на жената и нејзиниот однос со општеството, а кореографката Данчевска во најавата за нејзината кореографија вели: „Не ми ги допирај очите“ се поистоветува со човекот во Македонија. Го слави животот, убавото во едноставното и гневот во постоењето (Кога ќе те снема, може повторно да те заима). Следете политика и главите кон сонцето!“ Музиката за претставата ја потпишуваат „Артефакт“ и Гордан Спасовски трио. Во перформансот настапуваат Адријана Данчевска и Дејан Битровски.

Во рамки на вечерта, во 18 часот, уметничката директорка на Скопје танцовиот театар и деканка на Филмската академија, Катедра за современ танц при универзитетот „Гоце Делчев“, професор Рисима Рисимкин, ќе одржи предавање на тема „Развој на софтвер за компјутерски генерирана кореографија“, а на 9 јуни, во рамки на фестивалската програма Андријана Данчевска ќе има работилница за современ танц, известија од Скопје танцовиот театар.

Адријана Данчевска, танчер и кореограф, е активен член на Скопје танцовиот театар. Свое кореографско деби има со кратката кореографија „32°“, како дел од претставата „Импулс“, премиерно изведена на „Танц Фест Скопје“. Потписник е на повеќе кореографии: „Погрешно“ за Универзитетот за убави уметности од Цирих, Швајцарија; „Скеч“ за Кодартс универзитетот од Холандија; продукции на Скопје танцовиот театар со наслов „Жива на друго место“, „Д.О.Л.“, „Дома“, „Не ми ги допирај очите“, „Go Figure it Out“, како и на првиот танцов филм кај нас, насловен „Дома“. Со Скопје танцовиот театар настапува на сцените низ Македонија, како и на повеќе светски фестивали. Од септември 2017 Данчевска е асистент на Катедрата за современ танц при УГД.

Дејан Битровски, танчер и кореограф, активен член на Скопје танцовиот театар. Свое кореографско деби има во мај 2017 година со кореографијата „Јас и ние“, а потписник е и на кореографиите „Луцидниот Јос“, „Autline“, „Ѓаволска дупка“, „09190“, во продукција на Скопје танцовиот театар. Од септември 2017 активно работи во организација на програмите на Скопје танцовиот театар и „Танц фест“. Од септември 2018 Битровски е стручен соработник на Катедрата за современ танц при УГД. Со Скопје танцовиот театар настапува на сцените низ Македонија и на светски фестивали, меѓу кои и на сцената на Националниот театар за современ танц „Шајо“ во Париз, Франција.

Анастасија Данчевска е современ уметник и танчер, активен член е на Скопје танцовиот театар од 2014 година. Во 2017 по завршувањето на студиите станува и стручен соработник за класичен балет на Катедрата за современ танц на Филмската академија при универзитетот „Гоце Делчев“ во Штип. Од 2021/2022 запишува двегодишни магистерски студии како танцов педагог на универзитетот „Гоце Делчев“ Штип.