СКОПЈЕ НИКАКО ДА СТАНЕ ВЕЛОГРАД: Шилегов даде нов рок, 2021 година – Слободен печат
ВестиВи ПрепорачувамеСкопје

СКОПЈЕ НИКАКО ДА СТАНЕ ВЕЛОГРАД: Шилегов даде нов рок, 2021 година

Во најава, како што кажа Шилегов е изградба на нови 16 км велосипедски патеки, како и изградба на вело патеки и на улица Благоја Стефковски во Маџари, на булевар Асном како и на Х.Т. Карпош

Изградени велосипедски патеки во должина од 14,6 километри, конектори кои ги поврзуваат велосипедските патеки и овозможување на велосипедско поврзување на Голем ринг се дел од активностите кои Град Скопје ги презел изминатиов двегодишен период за подобрување на велосипедската мрежа во градот.

Градоначалникот на Град Скопје, Петре Шилегов, денеска истакна дека редовно се преземаат чекори кои ќе придонесат за поголема мобилност на населението.

Во најава, како што кажа Шилегов, е изградба на нови 16 км велосипедски патеки, како и изградба на вело патеки и на улица „Благоја Стефковски“ во Маџари, на булевар „АСНОМ“ како и на „Х.Т. Карпош“.

– За две години Скопје ќе биде велоград. Оваа година градиме и реконструираме нови велосипедски патеки во должина од 16 километри. Изградивме и реконаструиравме велосипедски патеки и велосипедски ленти на улиците „Московска”, „4 Јули”, „Даме Груев”, булевар „Србија – истакна Шилегов и потсети:

– Издвоивме 12 милиони денари со што на 4.000 граѓани им го субвенциониравме купувањето велосипед. Дополнително, субвенциониравме и купување електрични тротинети. Безбедноста на велосипедистите ја подобривме со поставување заштитни столбчиња, и веќе може да се забележи дека нема паркирани возила пред Министерство за правда, на Бит пазар, и на улица „Максим Горки“ – објасни Шилегов.

Но, Скопје веќе одамна требаше да биде велоград. Уште во мандатот на претходниот градоначалник на Град Скопје, Коце Трајановски на скопјани им се ветуваше овој проект кој треба да го растерети сообраќајот во метрополата. Проектот Скопје велоград започна во 2014 година, и според тогашните предвидувања, истиот требаше да финишира во 2017 година.

Денеска, Шилегов реализацијата на проектот ја одложи на уште две години.

Во рамки на велосипедскиот план 2019- 2021 година, се предвидува подобрување на целокупната велосипедска инфраструктура, која според кажаното, ќе опфати воведување на зона на смирен сообраќај, со која би требало до 2021 година смртните случаи на велосипедистите да се сведат на нула. Исто така, планирано е воведување на денови без автомобили, како и овозможување на постојана велосипедска мрежа.

Велосипедизмот во Скопје има голем потенцијал. Поволните временски услови и температурата на воздухот преку целата година на велосипедистите им овозможуваат непречено користење на ова алтернативно превозно средство, рече денеска Даниел Павлевски, од секторот за сообраќај на Град Скопје, и ги повика граѓаните со употреба на велосипедите и електричните тротинети да дадат придонес во борбата против загадувањето.

Преземањето на оваа содржина или на делови од неа без непосреден договор со редакцијата на Слободен Печат значи експлицитно прифаќање на условите за преземање, кои се објавени на сајтот.

Тагови

Напишете коментар

Вашата адреса за е-пошта нема да биде објавена. Задолжителните полиња се означени со *

Close