Сколс удри по играчите на Манчестер јунајтед
Манчестер јунајтед неславно го заврши своето учество во Лигата на шамионите оваа сезона, со пораз од Лајпциг.
Легендарниот играч на Јунајтед, Пол Сколс, не ги штедеше во критиките актуелните играчи на „црвените ѓаволи“, а прв на удар беше голманот Давид де Хеа.
– Де Хеа направи голема грешка при третиот гол на Лајпциг, тој има страв да не се повреди повторно. Тој центаршут не смееше така лесно да помине низ шеснаесетникот, како голман морате да истрчате и да реагирате. Можете да добиете топка во лице, може и да се повредите, но тој само го сврте грбот. Де Хеа реагираше криминално за искусен голман каков што е тој – распали Сколс по голманот на Јунајтед.
Сколс не го штедеше ниту најскапиот дефанзивец на светот, Хари Мегваер.
– Интервјуто на Мегваер беше загрижувачко, како може да каже дека не биле подготвени за првите 20 минути од натпреварот. Како не можете да бидете подготвени за вака важен и тежок натпревар во Германија. Воопшто не требаше да се доведат во позиција да се борат за пласман во осминафиналето, а кога веќе се најдоа во таква ситуација, тогаш не се ниту подготвени за првите 20 минути – изјави Сколс.
Манчестер јунајтед сепак ќе остане во Европа, но настапите ќе ги продолжи во Лигата на Европа, што не ги задоволува амбициите на англискиот тим.