Херојска партија на избраниците на селекторот Васко Скендеровски на денешното гостување играјќи реми 1:1 во Врање против Србија.

Македонската футсал репрезентација со ова реми ги одржува шансите за пласман на Европското првенство. Скендеровски после натпреварот изјави дека на крајот и среќата беше на страната на неговите играчи:

– Честитки за момците. Тие се најзаслужни за еден од најголемите резултати кој нашата футсал репрезентација го има постигнато во својата историја. Да се освои бод против една селекција која е од првиот барабан по квалитет, а ние од последниот, четврти и тоа на гостински терен е рамно на светско чудо.

Навистина имавме и среќа, но таа ги следи храбрите. Не посочувам никој посебно, но голманот Петровски кој правеше чуда. А, еден човек има огромна заслуга, не беше на теренот, но беше до мене и навистина ни помогна многу со анализите, а тоа е Мато Станковиќ.

Кога ќе се додаде дека на овој натпревар бевме без двајца играчи од стартната постава, Даниел Де Соуза и Ранготов, навистина сме многу горди како ја претставивме Македонија во Врање. Сега малку одмор и од утре треба да размислуваме за натпреварот во вторник против истиот противник. Вратите за пласман на ЕП ни се ширум отворени, сега треба паметно, да одиме чекор по чекор – се зборовите на Скендеровски на официјалната фејсбук страница на Фудбалската федерација на Македонија (ФФМ).

На табелата во квалификациската група „4“ после три кола води Босна и Херцеговина со девет бодови која веќе слави пласман на континенталниот собир, а по два бодови имаат Романија, Македонија и Србија.

На ЕП ќе се пласираат првопласираните од сите осум квалификациски групи, како и шест најдобро второпласирани, а седмата и осмата најдобро второпласирана селекција ќе играат бараж.