Скапо било да се одржуваат фонтаните: Општина Аеродром во нив ќе сади цвеќиња

Фото: Фејсбук

Сите фонтани на територијата на Општина Аеродром, кои според проценката на локалната власт се нефункционални, ќе се наполнат со земја и во нив ќе се насадат цвеќиња и други растенија. На тој начин Општината, како што велат од таму, ќе заштеди на скапото одржување на фонтаните.

– Адаптацијата има не само економска логика, туку и еколошка! Имено, фонтаните кои се стари повеќе од 10 години (во случајов 12), се неисплатливи (скапи) за одржување. Токму затоа, во развиениот свет се адаптираат во зелени (еколошки) оази. Кој прошетал-видел и знае! Кој не, ете има шанса да види и научи. Накратко, ја носиме најдобрата европска пракса дома – се вели во објаснувањето од Општина Аеродром на стотината коментари под објавата дека некогашната фонтана во близина на ТЦ „Бисер“ е претворена во катче хортикултурно уредено со најразлични цвеќиња и зимзелени дрвја.

Градоначалникот Златко Марин пак, на својата фејсбук страна тврди дека ова се прави по барање на граѓаните.

– Се одлучивме за ваквиот чекор поради барањето од граѓаните од тој дел на општината. Во наредниот период хортикултурно ќе ги уредиме и другите нефункционални фонтани, кои за аеродромци ќе претставуваат вистинско зелено катче каде што ќе можат да уживаат во пролетните и летните денови – напиша Марин.

Тој уште додава дека остануваат посветени на создавање нови зелени површини и хортикултурно уредени катчиња.

 

Видео на денот